Foz, 21 de marzo de 2018. No Concello de Foz celebraranse este mércores, e o venres reunións da xunta de portavoces co obxectivo de negociar asuntos importantes para o municipio. Na desta xornada abordaranse cuestións de carácter urbanístico como a taxación do solar que hai fronte á Casa da Cultura, o inventario de camiños públicos (pendente de resolver as alegacións presentadas) e o borrador do inventariado de bens públicos, entre outros asuntos. E na convocada para o venres a empresa Eptisa presentará o informe sobre cal é a mellor xestión do ciclo da auga en Foz.
O alcalde focense, Javier Jorge Castiñeira, anunciou que “esta semana haberá dúas reunións da xunta de portavoces. A de hoxe será máis ben técnica, asociada a temas urbanísticos, onde abordaremos con todos os grupos da corporación o informe que hai, a taxación que se fixo, o estudo e a valoración do solar que hai diante da Casa da Cultura, tal e como pedía o Bloque Nacionalista Galego, posto que xa está feita esa taxación. Valoraremos tamén o inventario de camiños públicos, que está practicamente rematado; só queda resolver as 50 alegacións que había presentadas no seu momento, trataremos de desenvolvelas durante o día de hoxe para analizalas todas. Ademais abordaremos o borrador do inventario de bens públicos, que tamén está realizando o Concello de Foz, para tratar de ter inventariadas e documentadas todas as propiedades municipais, o que a día de hoxe non existe. Xa está contratada unha empresa que o está realizando, pero é ben certo que necesitamos a opinión de todos os grupos”.
Javier Castiñeira sinala que “para rematar a xuntanza de hoxe abordaremos a afección do plan básico da Xunta que pode afectar a núcleos urbanisticamente e mentres non se resolva o Plan Xeral loxicamente será case a día de hoxe a documentación urbanística que se poida ter”.
O rexedor municipal explicou ademais que “a do venres tamén será unha reunión importante dos portavoces, na que técnicos de Eptisa nos presentarán o informe e nos darán os resultados sobre cal é a mellor xestión do ciclo da auga en Foz. Se seguimos cunha concesión e a sacamos a concurso público, como toca xa ao ter caducado a concesión actual con Gestagua, ou, como di o BNG e propón tamén o Partido Socialista, municipalizar o servizo e cambiar completamente de xestión. Para iso encargamos un informe a unha empresa que entende disto e imos ver o que nos presenta; a partir de aí tomaremos decisións. O que si temos claro é que para nós a opinión dos técnicos é fundamental e polo tanto estamos esperando cal é a decisión”.
Castiñeira rematou comentando que “é unha semana intensa, retomando todos estes asuntos pendentes e esperando que dean o seu froito e proximamente poidamos avanzar nesas cuestións”.