O BNG de Cervo lamenta o espectáculo absurdo que está ofrecendo o máximo accionista de Sargadelos e insta aos poderes públicos e ao pobo de Cervo a non caer na confusión creada por Segismundo García para, aparentemente, liquidar a factoría do concello de Cervo

Cervo, 25 de agosto de 2018. O BNG de Cervo condena os feitos acontecidos na última semana na fábrica de cerámica de Sargadelos, a cal está sendo aniquilada e despezada de maneira sistemática mediante as accións do seu máximo accionista e administrador único, Segismundo García. Cómpre lembrar que se trata da máis grande iniciativa empresarial nacida no Concello de Cervo, exemplo de creación de riqueza colectiva e de utilización da iniciativa privada para xerar beneficios á comunidade e ao país, en lugar da habitual acumulación de riqueza en poucas mans.
O responsábel local do BNG cervense, Diego Fernández, denunciou que “en Cervo pasamos de contar cunha empresa recoñecida a nivel mundial pola súa filosofía e aposta polos valores culturais que produciu un valor engadido elevadísimo e insólito no capitalismo moderno para tratarse simplemente dunha fábrica de cerámica, a padecer un empresario que semella non saber dirixir unha empresa sen precarizar as condicións laborais”. Para Fernández, a actitude e comportamento de Segismundo García é a “dun señor que pensa que a xestión dunha compañía cuxos maiores activos son a creación artística, a preservación duns valores culturais propios e a calidade das condicións de traballo pode facerse da mesma maneira ca nun negocio de hostalería ao pé dunha estrada”. Segundo o responsábel local, estamos ante o caso dun empresario “que perde sentenza tras sentenza e acumula multa tras multa por incumprir de maneira esaxerada a lexislación laboral. Pero, segundo el, a culpa é dos sindicatos, dos xuíces, da Inspección de Traballo ou dos políticos que elaboran leis que favorecen aos traballadores”.
Desde o grupo do BNG de Cervo pídeselle aos gobernos municipal e galego que non miren para outro lado: “Non vale a escusa de que se trata dunha empresa privada. Non se pode permitir que un empresario presuma de incumprir a lei de maneira reiterada (por exemplo, as ordenanzas municipais) sen que haxa unha resposta por parte de quen ten a obriga de que se respecten as normas”, recalcou Fernández.
A situación vivida en Sargadelos nas últimas semanas, propiciada polo seu administrador único Segismundo García, “está arrastrando pola lama o nome e o prestixio de Sargadelos e, como consecuencia, o valor engadido que produce riqueza para todo o pobo de Cervo”. Nun exercicio de memoria histórica, desde o BNG lembran os paralelismos que poderían trazarse cun episodio acontecido a finais do século XIX, cando en 1878 chegou ás antigas Reais Fábricas de louza de Sargadelos o señor Javier López y García Bandujo “para facerse cargo das fábricas co fin de cobrar unha débeda que rematou un tempo despois coa demolición das instalacións”, explicou Diego Fernández. Para evitar que a historia se repita, desde a formación nacionalista cervense esixen que o Concello de Cervo tome medidas para que cese “a campaña de desprestixio autoinflixido polo propietario, as ameazas falsas e imposibles (non pode despedir 49 persoas, a metade do cadro de persoal) e a continua actitude antisindical que se prolonga desde que comezou a súa xestión”.
O chamamento esténdese tamén ao pobo de Cervo, para loitaren por conservar a filosofía dunha empresa que trouxo riqueza, benestar e cultura, e así evitar que se convirta nunha fábrica de facer cartos unicamente para o beneficio empresarial. En palabras do responsábel local Diego Fernández, “debemos evitar que Sargadelos se convirta nunha vítima da especulación”.
Polo tanto, o BNG de Cervo reclama das autoridades laborais que interveñan de inmediato para investigar os incumprimentos dos que o seu propietario presume. Así mesmo, insta ao resto de grupos políticos e ao pobo de Cervo a que, conxuntamente, evitemos que o máximo accionista e administrador único da empresa, Segismundo García, troque a riqueza da Cerámica de Sargadelos en pobreza e sufrimento.