Transportes asegura que a A-74 avanza “e desminte as críticas do PP”

Madrid, 8 de abril, 2026. O senador socialista César Mogo criticou que o PP, a través do senador José Manuel Balseiro, volvese empregar o Senado como “caixa de resonancia da súa propaganda”, especialmente en relación coa Autovía da Mariña. Segundo Mogo, durante os sete anos de goberno do PP “non houbo nin un só avance, nin un só centímetro executado” nesta infraestrutura.

Na súa intervención, Balseiro volveu recibir a resposta do ministro de Transportes, Óscar Puente, quen reiterou que o compromiso do Goberno coa construción da A-74 Autovía da Mariña é firme. O ministro explicou que o tramo Barreiros–O Carme se atopa xa en fase previa á súa aprobación definitiva, mentres que o tramo O Carme–Foz está en fase de redacción para a súa posterior aprobación. Con estes datos, o Goberno reafirma que a autovía será unha realidade, fronte ás críticas do PP.

Puente lembrou tamén que foi o actual Executivo quen impulsou proxectos como a Autovía Lugo–Santiago ou a estación intermodal de Lugo, ambas actuacións próximas a finalizar.

Mogo chamou a atención sobre o feito de que o senador Balseiro “non diga nada” no Senado sobre os “numerosos incumprimentos” da Xunta en materia de infraestruturas, nin sobre a situación da variante de Viveiro, que —segundo o senador socialista— pasou de proxectarse como Vía de Alta Capacidade a converterse “nunha estrada convencional que non responde ás necesidades da Mariña”.