Marta Dacosta reivindica o legado de Castelo no 75 aniversario da súa morte e destaca a súa condición como primeiro presidente de Galiza no acto organizado polo BNG e a FGS en Vilalba

Con este acto dende o BNG e a FGS intentase socializar o pensamento político de Castelao

Vilalba, 30 de marzo de 2025. A escritora e divulgadora Marta Dacosta destacou na conferencia organizada polo BNG e a Fundación Galiza que, 75 despois da súa morte, existe aínda unha débeda de recoñecemento con Castelao e insistiu na necesidade de difundir a figura íntegra do nacionalista. No acto, que se enmarca dentro do programa organizado con motivo do Ano Castelao, reivindicouse a súa condición como primeiro presidente de Galiza.

A conferencia de Dacosta que tivo lugar na Casa da Cultura de Vilalba contou coa participación do responsábel local Xabier Novo que destacou o amplo programa que o BNG está a desenvolver con motivo do Ano Castelao por todo o país porque, segundo dixo, “é necesario difundir a súa figura na súa integridade, a dimensión inmensa dese brillante artista, escritor, investigador que, segundo el mesmo dicía, era fundamentalmente político”. Neste sentido, Novo lamentou que nesta conmemoración se estea a ocultar a súa condición de político nacionalista e criticou que o voto en contra do PP e a abstención do PSOE impedise o seu recoñecemento oficial no Parlamento Galego como primeiro presidente lexítimo de Galiza, o que propuña o BNG por se poñer á fronte do Consello de Galiza, o goberno galego no exilio.

Do mesmo xeito, Dacosta destacou que é preciso poñer o foco no pensamento de Castelao que traslada a verdadeira trabe de toda a súa obra: a defensa dos dereitos e o amor a Galiza e o nacionalismo que preside a súa praxe e a súa teoría política. No acto, lamentouse que “se continúe a teimar deturpar a súa figura ocultando ou negando a súa clara condición nacionalista, o que deixa a vista que a súa figura aínda é incómoda”. Por iso, reivindicou o seu “legado político, a súa xenerosa e brillante obra e a súa traxectoria de compromiso co noso país que teñen que ser guía para continuar defendendo os nosos intereses, os das clases populares e tamén as loitas de liberación nacional no mundo e de costas á orde internacional que impoñen as grandes potencias colonizadoras que é a grande lección que nos deixou”.

A divulgadora tamén nos convida a poñer as gafas lilás para ler e ver a obra de Castelao, “poñer as gafas lilás para ler Os vellos non deben namorarse, ou para mirar a maior parte dos seus debuxos”

Recoñecer a Castelao como referencia fundamental para o proxecto político e ideolóxico do nacionalismo e imprescindíbel para entender a historia de Galiza e un líder indiscutíbel dunha dimensión e integridade únicas. “O nacionalismo galego ten desde a súa reorganización unha guía clara que foi o seu maxisterio e o seu libro Sempre en Galiza, coa defensa da necesidade de crear organizacións propias e a urxencia de ampliar as bases até construír un gran movemento de masas, o mesmo obxectivo que animaba o Partido Galeguista de Castelao e Bóveda” reivindica Marta . Destaca así que Castelao é unha figura clave sen a que o nacionalismo galego non sería hoxe o proxecto transformador de defensa de Galiza que é, seguindo a lección que Castelao expresou dicindo que “o verdadeiro heroísmo consiste en trocar os anceios en realidades, as ideas en feitos”.

Cun amplo programa de actos, o BNG e a FGS están a poñer o foco na traxectoria do que consideran unha “das principais figuras da nosa historia, fundamental para entender o nacionalismo de hoxe”. Distintas personalidades coñecedoras da figura de Castelao como Francisco Rodríguez, Pilar García Negro,Manuel Rei ou Xoán Carlos Garrido Couceiro participan no ciclo de conferencias que se desenvolve ao longo de todo o país xunto con outras iniciativas de promoción e difusión neste ano en que se cumpre o 75 aniversario do seu falecemento.