En marcha en Burela as obras de mellora na saída do camiño de Pron cara á estrada da Deputación

A actuación busca aumentar a seguridade e accesibilidade nun punto clave para os veciños

Burela, 15 de maio de 2025. O Concello de Burela iniciou recentemente as obras para mellorar o camiño de Pron, que conecta a Vila do Medio coa estrada da Deputación que conduce ao Monte Castelo. Esta intervención responde a unha demanda antiga dos veciños, que sinalaban problemas de taponamento e dificultades para incorporarse con seguridade á vía principal.

“Trátase dunha obra moi solicitada polos veciños, sobre todo para aqueles que usan o camiño desde Vila do Medio ata a estrada da Deputación. Na saída, xurdían taponamentos que mesmo supoñían perigo para a incorporación dos coches. Decidimos ampliar a saída para mellorar a seguridade e a visibilidad”, explica Ramiro Fernández, concelleiro de obras.

Esta intervención, que conta cunha financiación de máis de 40.000 euros a través do Plan de Mellora de Camiños Rurais da Xunta de Galicia, consiste na construción dunha escollera que ampliará o ancho da calzada, mellorando a visibilidade e a accesibilidade para os vehículos que saen da vila cara á estrada principal.

Segundo o concelleiro, “aínda que non é unha das obras máis grandes que temos en marcha, é unha actuación moi valorada polos veciños, que están moi contentos de que esta solución se estea a levar a cabo para resolver un problema que levaban tempo observando”.

Pola súa banda, a alcaldesa de Burela, Carmela López, destacou que “as obras serven para mellorar o día a día da xente. Non se fan por facer, senón para que vivir en Burela sexa máis cómodo, accesible e práctico. E para acertar, hai que estar ao carón dos veciños e veciñas, falar con eles e saber o que precisan”, concluiu.