Estabilizados ou extinguidos os lumes que queimaron o rural de Valdeorras, Pobra de Brollón, Terra de Monterrei, Maceda, O Bolo, Chandrexa de Queixa e outras áreas galegas chega o tempo de contabilizarmos os danos, planificarmos a reconstrución e-tamén, sen dúbida ningunha-, o tempo de lle reclamar ao Goberno galego, responsábel desta catástrofe, as súas responsabilidades.
Neste senso, nas dúas últimas semanas desenvolvín nestas mesmas páxinas relatorios onde denunciaba as eivas da dirección política da Xunta ao longo dos 16 anos de gobernos de Núñez Feijóo e Rueda nos eidos da prevención, da extinción e da comunicación dos incendios, amosando os graves erros da devandita dirección política.
Porén, a análise demorada das políticas públicas dos gobernos do PPdeG dende abril de 2009 amosan algo que vai moito máis aló dos erros graves na xestión e planificación destas políticas públicas. Os populares, como ven de denunciar publicamente o director xeral de Montes (2005-2009) do pasado goberno de coalición Alberte Blanco (BNG) axiña desmontaron pezas fundamentais da lexislación promulgada pola entón maioría parlamentaria BNG-PSdeG, como foi a franxa de protección de 125/100 mts para núcleos de poboación e infraestruturas, rebaixada por Feijóo a 50 mts. ou a ferramenta indispensábel de xestión do minifundismo forestal, as Unidades de Xestión Forestal (UXFOR). Tamén flexibilizaron o control anterior do crecente monocultivo do eucalipto. O orzamento de prevención diminuíu un 5% dende 2008, mentres o de extinción medraba nun 89%, só que cada vez máis privatizado canto á súa xestión.
O problema xa non e só de xestión desaquelada ou neglixente. É de desleixo polo territorio, dunha evidente falla, non só de plans e solucións, senón de sensibilidade. O Goberno galego asume como vectores da súa política no medio rural os mesmos que ven de presentar Núñez Feijóo como receita recentralizadora do PP para o conxunto do Estado: os proxectos eólicos e mineiros e a maximización extrativista da facturación para ENCE, NAVIGATOR ou, seica pasado mañá, ALTRI.
Velaí a chave deste setembro político que está a debutar: a oposición parlamentaria do BNG e, nunha segunda liña, do PSdeG, vai esixir, canda a dimisión do Goberno, a fonda remuda dunha política agroforestal que esfarela e empobrece o país e semella atender máis as requirimentos de multinacionais e grandes empresas privadas estatais ca as necesidades da veciñanza e do territorio. E as conexións entre neglixencias, complicidades e desleixos van apuntar por forza ao proxecto de ALTRI, á subordinación do medio rural á minaría e macroprodución eólica e ao fomento pasivo do abandono do rural recortando os servizos públicos no seu ámbito. Non nos trabuquemos, axiña vaise xogar tanto a lexislatura como a posibilidade real de remuda política no 2028.
E que ninguén ofreza unha inviábel e desaquelada recentralización competencial como solución. Galicia sempre poderá pedir ou fornecer de axuda a outros países e territorios nas emerxencias. Mais para amañar o noso problema territorial, para definir o noso futuro, para previr e extinguir os nosos lumes, as solucións han ser as que nos decidamos. Na recentralización que ofrece Núñez Feijóo latexa a intención de obrigarmos a todos os territorios a achantar coas súas solucións, que transitan por elixir ás empresas da súa corda para obter os rendementos destas catástrofes públicas.
Era o único ocupante do turismo e os Bombeiros de Vilalba tiveron que excarceralo. Ao fío das 13:30 horas, un particular informou ao 112 Galicia dun coche que se saíra da vía e acabara batendo contra unha árbore no quilómetro 75 da N-640, en Ludrio (Castro de Rei). O propio alertador sinalou que o accidente semellaba grave polo estado no que quedara o vehículo. Cando chegaron ao lugar, os servizos de emerxencias confirmaron que só había unha persoa implicada,un home que resultou falecido e foi excarcerado polos bombeiros. No operativo participaron Urxencias Sanitarias de Galicia-061, a Garda Civil de Tráfico, os Bombeiros de Vilalba e os servizos de mantemento da estrada.
O director xeral agradeceu aos membros e traballadores da entidade todo o seu labor na defensa dos dereitos dos máis novos. Deste xeito, puxo en valor a súa traxectoria e o compromiso cun modelo integrador e inclusivo no que os menores do sistema de protección vivan nunha contorna totalmente familiar. Neste sentido, Jacobo Rey fixo fincapé na importancia da colaboración entre a Xunta e o tecido social para seguir fortalecendo un sistema que garanta o benestar dos nenos e adolescentes, con centros como San Aníbal que conforman un auténtico fogar.
A alcaldesa Marta Rouco inaugurou a cita, que abriu coa IV Volta Ciclista á Terra Chá e cunha programación centrada na relación entre Galicia e Cuba e na memoria da emigración. Houbo unha mesa redonda sobre o Centro Galego da Habana, a exposición Galicia Imaxinada e música, ademais dunha mostra de xornais antigos. Rouco reivindicou a importancia de lembrar a emigración galega e apelou a mirar con humanidade as migracións actuais, destacando tamén o papel das asociacións culturais das parroquias na conservación das tradicións. A feira continúa con desfile de época, xantar popular, xogos, animación, baile cubano, foliada, queimada e propostas musicais e artesanais ata a noite.
Na IV Festa dos Ovos Rotos con Chourizo e Feira de Artesanía, María José Gómez puxo en valor a importancia económica e social deste produto e o papel da artesanía alimentaria, con sete operadores presentes. Subliñou que o evento consolídase como unha cita que promove a gastronomía galega e recupera oficios tradicionais, dinamizando a vida económica e social de Castro de Rei.
Ocorreu minutos antes das 11:30 horas. Unha persoa foi trasladada ao hospital tras resultar ferida na colisión entre un coche e un autobús no quilómetro 512 da A-8 en sentido A Coruña, en Vilaframil (Ribadeo). Entre os alertadores estiveron as persoas que viaxaban no coche, que puideran saír do vehículo. Por outra banda, o autobús conseguiu deterse uns metros máis adiante. Ao punto desprazáronse Urxencias Sanitarias de Galicia-061, a Garda Civil de Tráfico e os servizos de mantemento da autovía.
O próximo luns 14 de setembro comeza un novo curso de español dirixido a persoas estranxeiras da man de Ecos do Sur, que se desenvolverá ata o 9 de outubro. A formación será dun total de 80 horas e as clases terán lugar de luns a venres, de 9:30 a 13:30 horas no Centro de Formación Ocupacional. O concelleiro de Inmigración, Mario Pillado, destacou o valor destas propostas para “facilitar ferramentas útiles ás persoas estranxeiras residentes no municipio e favorecer a súa integración, tanto social como administrativa”.
Finalizado o encontro, de carácter privado, o Cónsul asinou no Libro de Ouro da Deputación e a Presidenta fíxolle entrega dun agasallo institucional. Trala xuntanza Carmela López manifestou a súa satisfacción porque “traballamos para avanzar en novas vías de colaboración, e en posibles proxectos que serven para reforzar a relación entre a Deputación e o veciño país de Portugal”.
