O executivo local denuncia a falta de apoio para un proxecto que xa conta cunha subvención da Xunta e que considera clave para a dinamización económica e social da vila
Viveiro, 8 de abril de 2026. O Concello de Viveiro expresa o seu malestar tras a reunión mantida co vicepresidente da Deputación de Lugo, Efrén Castro, na que se confirmou a negativa da institución provincial a colaborar economicamente na reforma da Praza de Abastos, un proxecto que o executivo municipal considera estratéxico para o presente e o futuro da vila.
Desde o Goberno de Mariña Gueimunde lémbrase que esta actuación conta xa cun apoio da Xunta de Galicia de 320.000 euros para a súa execución, estruturado en dúas anualidades de 160.000 euros, en 2026 e 2027. O Concello leva tempo buscando completar o financiamento necesario para facer realidade a intervención. O proxecto ten un orzamento estimado de 768.068,68 euros e a administración local xa explorara outras vías complementarias de apoio.
O executivo municipal sostén que, ao longo deste proceso, foi atendendo as distintas condicións e requisitos que se lle foron trasladando desde a Deputación. Nun primeiro momento, instouse ao Concello a priorizar investimentos, e Viveiro decidiu situar a reforma da Praza de Abastos como unha actuación preferente pola súa relevancia patrimonial, comercial e social.
Posteriormente, presentáronse os proxectos técnicos requiridos, buscouse a implicación doutras administracións e mesmo se agardou á posible dispoñibilidade de remanentes, sen que finalmente se traducise en ningún compromiso económico por parte da institución provincial.
«O que se nos trasladou hoxe é, simplemente, unha mala noticia para Viveiro. Falamos dun proxecto fundamental para recuperar e dinamizar un espazo emblemático, situado no corazón do casco histórico, e tamén dunha oportunidade para reforzar a actividade comercial e social da vila. Non estamos a pedir un capricho, senón apoio institucional para unha actuación necesaria», explica a alcaldesa Mariña Gueimunde.
O Concello lembra que a Praza de Abastos é un inmoble singular para Viveiro. Data de 1925, foi proxectada polo arquitecto Ricardo García Puig e está considerada unha das edificacións de abastos máis antigas e características de Galicia pola súa tipoloxía de mercado de peixe. O Goberno local subliña que a súa rehabilitación non responde só a unha necesidade material, senón tamén á vontade de protexer e revitalizar un espazo de grande valor patrimonial e de identidade.
Na mesma liña, o executivo viveirense asegura que a falta de resposta non se limita ao proxecto da Praza de Abastos, xa que tamén foron rexeitadas peticións de apoio noutras áreas, especialmente no ámbito deportivo e cultural, sen que se ofrecese ningunha alternativa de financiamento para iniciativas e entidades do municipio. Para o Concello, esta posición evidencia unha ausencia de compromiso institucional con Viveiro e compromete a chegada de investimentos necesarios para o seu desenvolvemento.
O Goberno local manifesta a súa preocupación pola falta de apoio da Deputación a Viveiro e considera que esta decisión evidencia un trato que non responde ás necesidades do municipio. Desde o Concello sinalan, ademais, que lles consta que a institución provincial adoita contar co BNG local nas iniciativas que apoia no municipio, facendo constar a súa participación cando anuncia esas actuacións, polo que lamentan que neste caso non exista a mesma disposición para colaborar nun proxecto estratéxico como a reforma da Praza de Abastos.
«A veciñanza de Viveiro merece saber que este Goberno municipal traballou, buscou financiamento, chamou ás portas doutras administracións e fixo os deberes para sacar adiante un proxecto prioritario. Se hoxe a Deputación decide non apoiar a Praza de Abastos nin outras actuacións no municipio, está lexitimada para facelo, pero tamén nós para dicir con claridade que é unha decisión profundamente negativa para Viveiro», expón Mariña Gueimunde.
Malia esta negativa, o Concello reafirma a súa vontade de seguir traballando para sacar adiante a reforma da Praza de Abastos e outros proxectos estratéxicos para o municipio. O executivo non descarta explorar novas vías de financiamento que permitan facer realidade actuacións que considera fundamentais para a dinamización económica, social e cultural da vila.
Estará dedicada á figura de Leopoldo Calvo-Sotelo, xa que neste 2026 cúmprese o centenario do nacemento de quen fora presidente do Goberno. No acto interviñeron o presidente do RCNR, Pablo Fernández, o director territorial de Deportes da Xunta, Manuel Otero, un dos fillos do tamén alcalde honorario de Ribadeo Víctor Calvo-Sotelo, e o rexedor ribadense, Dani Vega. Todos exaltaron a práctica deportiva na ría, a labor desenvolvida polo Real Club Náutico e a vinculación de Leopoldo Calvo-Sotelo co estuario. Entre o público asistente estaban máis membros da familia Calvo-Sotelo, directivos e ex directivos do RCNR, edís de Ribadeo e representantes de Acisa.
O grupo, composto por cinco mulleres e sete homes cunha media de 26 anos, foi recibido pola subdelegada do Goberno, Olimpia López, que lles agradeceu o compromiso co servizo público e destacou o papel esencial da Policía Nacional na seguridade cidadá. Oito axentes estarán na Comisaría de Lugo, dous en Monforte e dous en Viveiro. Ao finalizar as prácticas, escollerán destino definitivo segundo a puntuación obtida no proceso selectivo.
A iniciativa busca poñer en valor a diversidade cultural do municipio a través da gastronomía, convidando ás persoas de diferentes países a elaborar pratos típicos que se ofrecerán de forma gratuíta ao público. O Concello asumirá o custo dos ingredientes e asignará a cada participante un posto identificado co seu país de orixe. As inscricións poden realizarse ata o 29 de xullo enviando un correo a feiras@vilalba.es. Rouco chamou á participación para seguir construíndo unha Vilalba aberta e integradora, nunha feira que quere consolidarse como espazo de convivencia e dinamización da feira tradicional.
Ata o 4 de agosto poderán realizarse as renovacións, mantendo as tarifas aprobadas en asemblea: 200 € e 250 € para adultos, e acceso gratuíto para menores grazas ao convenio coa Fundación Imdecum, con opción voluntaria de abono infantil por 40 € con reserva de asento. A partir do 5 de agosto activaranse as novas altas. Os abonos poderán tramitarse a través de CLUBER ou presencialmente na oficina do club, con horario de mañá e tarde en xullo e só de mañá en agosto.
A Presidenta Carmela López destacou o valor deste produto emblemático da Mariña e o traballo do sector pesqueiro. Rocío Rivera e Herminia Pernas puxeron en valor a tradición mariñeira de Burela e o papel dos mariñeiros da Moncloa. O público degustou 450 tapas elaboradas con bonito nunha xornada que serviu de escaparate desta cita gastronómica e de convite a visitar Burela a próxima fin de semana.
As crianzas desfrutaron dunha refrescante xornada con inchables e xogos acuáticos na contorna do complexo deportivo da Veiga.
Trátase dunha mostra de 28 fotografías de gran formato do naturalista Ezequiel Martínez que reivindica a diversidade e a conservación da fauna salvaxe. A iniciativa, organizada polo Concello da Pastoriza en colaboración con ABANCA e Afundación dentro do proxecto Corrente cultural, poderá visitarse de balde ata o 26 de agosto. As imaxes, acompañadas de textos divulgativos elaborados por especialistas de Naturnova, amosan especies emblemáticas como o oso pardo, a cegoña, o cervo ou a aguia imperial, convidando a reflexionar sobre a importancia de protexer o patrimonio natural.
