‘A viaxe de Rosalía’, en Burela

O vindeiro sábado, 16 de abril, ás 17.30 horas no Auditorio da Casa da Cultura de Burela, dentro da Programación Cultural deste trimestre, teremos con todos vós “A viaxe de Rosalía” de LARRAITZ produccións artísticas. A entrada 2.5 euros e para todos os públicos. Patrocina a Consellería de Cultura da Xunta de Galicia, a Rede de Teatros e Auditorios de Galicia e AGADIC.

A actriz e titiriteira Larraitz Urruzola válese da interpretación actoral, de monicreques de mesa de grande talla artística así coma da manipulación de obxectos acompañada dunha música moi acaída e composta para o caso, un vestiario fermoso e dignísimo para os personaxes e, en definitiva, das ferramentas da narración oral tradicionais para que coñezamos as pasaxes máis importantes da vida de Rosalía de Castro e a súa obra literaria.

Xogarase a crear atmosferas poéticas , situacións que xorden da transformación dos obxectos e espazos, contribuindo a iniciarse no mundo da poesía, dos contos e do teatro a través da inventiva, da creación efémera e espontánea.

Na viaxe de Rosalía, Francisca do Campo leva século e medio contando a todo o mundo a historia da súa afillada ROSALÍA DE CASTRO. Ela foi quen axudou a criala e quen compartiu as vivencias máis cotiás e entrañables.

Cargada de maletas con teas, zapatos e moitas cousas queridas para ela comparte con nós a traxectoria vital e artística dun símbolo irrenuniciable para a cultura galega.

A Francisca gústalle lembrarnos que ROSALÍA era unha muller culta, traballadora, valente e que interpretou como ninguén un tempo histórico na súa Terra.

Aquela meniña algareira que FRANCISCA coidou foise convertendo pouco a pouco na escritora que deixou unha pegada imborrable pola súa calidade literaria e un fondo de verdades profundas por fin sacadas á luz.

Ficha técnica
-Duración: 45 minutos.
-Público: familiar-recom+4 anos.
-Técnica. Monicreques de mesa.