Máis de 600 persoas en situación de dependencia benefícianse do servizo de axuda no fogar que financia a xunta na Mariña

Viveiro (Lugo), 11 de maio de 2017.- O delegado territorial da Xunta de Galicia en Lugo, José Manuel Balseiro, puxo en valor o esforzo que está a desenvolver a Consellería de Política Social por reforzar o servizo de axuda no fogar a persoas en situación de dependencia do que se benefician máis de 600 usuarios da Mariña lucense, case dúas veces máis que en 2009.

Balseiro explicou que no conxunto da comarca incrementou en máis dun 12,5% o número de horas asignadas con respecto ao ano 2016. De feito, a Xunta ofrece un total de 25.595 horas nos 16 concellos da Mariña o que supón un aumento de 2.844 horas respecto ao ano pasado.

Prazas públicas en residencias e centros
A Consellería de Política Social mantén o compromiso de continuar incrementando a atención ás persoas dependentes tamén noutros ámbitos como é o caso das residencias, centros de día e centros de día especializados para persoas con discapacidade. Nesta comarca benefícianse 485 homes e mulleres dunha praza pública neste tipo de instalacións.

Incremento do gasto social
“A Xunta mantivo como prioridade blindar o gasto social durante os peores anos da crise, por iso neses anos dedicáronse 8 de cada 10 euros do orzamento a gasto social. Agora, coa recuperación económica, estamos a reforzar estas partidas porque queremos que a recuperación chegue a todos os galegos”- salientou o delegado

É por iso que neste 2017 o gasto social da Xunta aumenta en 229 millóns de euros, cun importante reforzo dos fondos destinados a atender a persoas con dependencia, máis axudas para vítimas de violencia de xénero, incrementamos a RISGA e máis recursos para reforzar a sanidade e a educación pública.

Ademais, os beneficios fiscais da Xunta neste 2017 chegan ata os 391 millóns de euros: son ingresos que a Xunta deixa de percibir para que permanezan nas familias e nos fogares.