Decretazo contra o galego

No PP teñen demostrado en mil e unha ocasións ata que punto son quen de poñer todo patas arriba para acadar o poder. No caso das últimas eleccións galegas demostrárono en varias ocasións e con varios temas, aínda que nomeadamente co da lingua.

Fermín Bouza puxo de manifesto, no congreso de Ecolingua que o PP non gañou as eleccións do 1 de marzo pola cuestión da lingua. De feito, entre o electorado máis á esquerda do bipartito houbo certo desánimo polo pouco que se avanzou ao respecto. O desencanto tamén se deixou notar en xeral nunha parte do electorado tanto do PSdeG como do BNG ao non ser quen de reaccionar ante os erros cometidos e o conxunto de acusacións artelladas desde a dereita. Foi a abstención dunha parte do electorado do bipartito a que permitiu que o PP gañara as eleccións.

A loita interna dos birretes cos da boina (termos un tanto desfasados aparentemente, pero que reflicten con claridade o que está a ocorrer) vai deixar en moi mal lugar todo o consenso artellado en torno ao tema da lingua. O traballo de tantos anos estase a ir ao garete por culpa duns irresponsábeis que antepoñen os seus intereses persoais e de grupo fronte á comunidade.

É moi preocupante que estas loitas acaben afectando á vida política, económica e social do país. Nesta ocasión, e a través do tema da lingua, tamén vai afectar ao mundo da educación. Ben deixaron a súa pegada eliminando o sistema de gratuidade dos libros de texto, pospoñendo sine die, ou reducindo moi considerabelmente, as partidas orzamentarias dedicadas ás reformas imprescindíbeis en moitos centros educativos. Tamén, diminuíndo o número de prazas de profesores interinos e reducindo as substitucións. E agora tócalle ao tema da convivencia nos centros.

Baixo a aparente aureola da liberdade van trasladar aos centros educativos a responsabilidade propia dun gobernante. Agora resulta que os pais e nais imos poder escoller non sei cantas cousas. Aínda que empezaremos pola lingua vehicular no ensino. Velaí algunhas das contradicións no decretazo contra o galego:

Se Matemáticas en castelán e Sociais en galego, aínda que podendo cambiar cada pouco tempo, como se vai amañar o dos libros de texto?

Se os alumnos e alumnas se poden dirixir aos profesores na lingua que queiran, tamén o poderán facer estes últimos? E os rapaces/as escollerán a lingua dos libros de texto? E para faceren os exames? De que serve entón que se diga que Sociais ou Matemáticas van ser impartidos en galego se o alumnado vai poder usar soamente o castelán? É así como se quere garantir a aprendizaxe dunha lingua? Sen usala?

Por certo, se Educación para a Cidadanía vai ser impartida en Inglés, tamén aquí terán liberdade os alumnos e alumnas para usaren a lingua que prefiran? Tamén co referido aos libros de texto? E para faceren exames, traballos, etc?

Non son máis que algúns exemplos do feixe de contradicións que se derivan da aplicación do decretazo contra o galego. Non é bo punto de partida para o diálogo que din buscar desde o goberno da Xunta. Para que crearmos outro diálogo se xa o tiñamos acado coa LNL, e o PXNL? Por qué se descolgou o PP dese diálogo á hora de asinar o Decreto que os leva á práctica? Baixo o subterfuxio de potenciar o inglés no ensino quérese facer un decreto que non din nada en especial e deixa todo no aire con cláusulas que permitirían pasar polo sistema educativo galego sen aprender o galego. Un decreto a medida dos sectores máis antigalegos do país. Por moito que agora aparenten queixarse por consideráreno insuficiente.