O Concello de Cervo mellora o campo da festa en Trasbar e acomete outras obras de canalización de auga

Cervo, 10 de abril de 2013-O Concello de Cervo, a través da delegación de Zona Rural que dirixe José Ramón Soto, levou a cabo unha serie de actuacións en distintos puntos de Trasbar. Unha das obras consistiu na mellora do campo da festa deste burgo, onde se executaron unhas cunetas de formigón para recoller a auga procedente dun talude.

Ao mesmo tempo, levouse a cabo outra obra na zona do Pesquerdo, onde se colocaron 100 metros de tubaxes para canalizar a auga que baixa da capela de Santa Eufemia. Tamén se realizaron canalizacións no rego que discorre xunto ao campo da festa e fíxose unha base para colocar contedores do lixo. Outra das actuacións consistiu en poñer un peche con cadeas ao campo da festa para impedir a entrada continua de vehículos que estragaban o firme.

Unhas accións, todas elas, que foran solicitadas pola Asociación de Veciños do Burgo de Trasbar, que se puxera en contacto co Concello para trasladar estas demandas que dende a administración local consideraron esenciais. Unhas obras que supuxeron un investimento duns 5.000 euros que foron financiados con fondos municipais.

O edil de Zona Rural asegurou que dende o Concello “temos a intención de manter o noso contacto e a nosa colaboración continua coas entidades e asociacións do municipio para acometer obras de interese veciñal e outras iniciativas”. Soto explicou que “esta forma de traballar é moi produtiva á hora de atender as necesidades das distintas parroquias xa que a veciñanza e as asociacións son as que mellor coñecen a realidade da súa zona”.