Fernando Suárez agradece o compromiso da Deputación coas obras da residencia pero lembra que a Xunta aínda non puxo a partida comprometida no seu día

Ribadeo, 3 de setembro de 2015.- O alcalde, Fernando Suárez, acompañou á presidenta da Deputación, Elena Candia, na visita cursada á nova residencia de maiores, en construción. O rexedor agradeceu o compromiso da institución provincial e lembrou que a Xunta aínda non puxo a partida comprometida no seu día.

Na súa intervención o alcalde deulle a benvida á presidenta da Deputación de Lugo, “como responsable desa única institución que no seu momento, e grazas a iso, xunto co Concello, este edificio que temos detrás estase convertendo nunha realidade. O que era un soño colectivo estase convertendo nunha realidade. Aquí están todos os representantes do pobo, todos os do Concello, institucionalmente, incluídos os representantes das asociación veciñais que tan boa labor fixeron para ser o cemento de unión entre todos os grupos. Grazas a iso e grazas a todo o esforzo colectivo nos últimos 3 ou 4 anos este proxecto é unha realidade. Oxalá a Deputación, co seu apoio dos convenios asinados, que son 1.800.000 euros, xunto coa parte restante que é a que ten que poñer o Concello, oxalá tamén dentro de pouco poidamos ver o compromiso da outra institución, que é Xunta de Galicia, oxalá aporte a súa parte, ben pequena por certo. Aínda dende o 28 de agosto de 2014, todos os voceiros do PP, PSOE, de UPRI, do Bloque e das asociacións de veciños lles enviamos un documento que desmontaba aquelas malas interpretacións que a Xunta tiña sobre o que era necesario para que a Xunta puxera aqueles escasos 500.000 euros. Dende aquela, dende hai máis dun ano, non temos coñecemento”.

Suárez Barcia dixo que “coa Deputación está funcionando todo perfectamente, as certificacións de obra que se envían periodicamente, as que envía a empresa e que valida a dirección de obra, puntualmente dende a Deputación abónanse. Esperamos que continúe sendo así e agradecemos o teu compromiso”. O alcalde fíxolle unha petición a Elena Candia: “a ver si por favor se lles fas entrar en razón aos responsables da Xunta, concretamente á conselleira de Benestar e ao presidente da Xunta. Como ves isto é un proxecto de todos, estamos todos representados, estivemos dende o principio e imos estar así ata o final. Porque a fin de contas, máis alá da cuestión política de onde veñamos cada un, todos somos de Ribadeo e todos queremos vivir moitos anos, pero ao final das nosas vidas tamén queremos vir a sitios adecuados e agradables coma esta residencia”.

Pola súa banda, Elena Candia, sinalou que “sen deixar de recoñecer o acerto do seu inicio polo anterior equipo de goberno, si que nos parecía importante que este novo equipo visitase esta infraestrutura que é necesaria e manifestar de xeito contundente a dispoñibilidade coa Corporación e co alcalde nesta obra así como noutras necesidades que poidan presentarnos o Concello e os seus veciños”.