Oito mestres de APAGA atópanse en estadías formativas en Portugal e Finlandia, dentro do proxecto “conocimiento y formación para la empleabilidad”

Ribadeo, 11 de maio de 2017. Oito mestres de Apaga (Asociación de Profesores de Automoción de Galicia) participan do 8 ao 15 de maio nas saídas formativas a Portugal e a Finlandia. Fano dentro do proxecto Conocimiento y Formación para la Empleabilidad.

Catro dos mestres de Apaga atópanse en Lisboa, onde están a visitar a Escola Secundaria de Odivelas ou o Cepra (Centro de Formación Profesional de Reparación do Automóbil), entre outras instalacións. En Lisboa atópanse dous profesores do IES María Samiento, de Viveiro, un do IES As Mariñas, de Betanzos, e outro do IES García Barbón, de Verín. O centro de acollida desta expedición está a ser o Instituto de Educación Técnica de Lisboa.

E outros catro mestres están estes días na cidade de Lohja, en Finlandia, “onde abordan cuestións coma o tratamento dos residuos, así como o fracaso escolar e o abandono”, explica Álvaro Doural, presidente da Asociación de Profesores de Automoción de Galicia. Participan nesta mobilidade dous profesores do Instituto da Sangriña, de A Garda, un do CIFP Ferrolterra, e outro do IES Fene. Neste caso o centro de acollida é Luksia, onde estudan en diversos niveis educativos máis de 20.000 alumnos.