A Mancomunidade de Municipios da Mariña repartirá a vindeira semana os contedores adquiridos ao abeiro dunha subvención do fondo de compesanción ambiental

A Mariña, 25 de outubro de 2018. A Mancomunidade de Municipios da Mariña procederá dentro duns días ao reparto dos contedores adquiridos ao abeiro dunha subvención do Fondo de Compensación Ambiental. Dos 115.000 euros investidos na renovación destes recipientes, 81.000 euros proceden desa subvención e o resto é aportado polos 12 concellos que os solicitaron.
O presidente da Mancomunidade de Municipios da Mariña, Alfredo Llano, contou que “a Mancomunidade ten pedido, como fixo outros anos, ao Fondo de Cooperación Ambiental unha renovación de contedores, polo tanto cada Concello da Mancomunidade pediu os que cre que lle fan falta. Unha vez recibida a subvención e contratada xa a empresa que nos vai subministrar os contedores, hai que dicir que a xestión de petición foi ben levada e realmente todos os Concellos van adquirir os contedores que solicitaron no seu momento, e incluso é posible que teñan algún a maiores”.
Llano explicou que “para doce Concellos, hai outros catro que se agruparon entre si para facer outro tipo de petición, hai que dicir que contedores verdes de 800 litros temos 205, verdes de 360 litros temos 108, contedores amarelos temos 66, de papel son 44, de vidro 13, 48 papeleiras e 82 suxeita contedores. Isto é o que imos distribuír xa a partir da semana que ven, por todos os concellos. Pensamos que é unha boa solución para as necesidades que case todos temos de renovar ou de repoñer contedores, polo tanto esta é unha boa axuda. Foi unha subvención que solicitáramos para o 80% e déronnos o 70%, pero grazas á licitación e á rebaixa da empresa que saíu licitada, conseguimos un bo número de contedores e a moi bo prezo. Calculo que enseguida se van distribuír. Cada un dos Concellos vai ter aqueles que ten solicitado, e incluso queda en reserva algún máis que pode necesitar no futuro”.
Plan integrado de emprego
O presidente da Mancomunidade engadiu que “tamén estamos agardando a resolución do que temos solicitado, que nos parece moi importante, que é o plan integrado de emprego Avanza, que xa temos feito un aí atrás para dar formación a 60 persoas cunhas características laborais moi concretas e determinadas, e dun determinado colectivo. Cremos que fixemos desde a Mancomunidade unha boa labor no plan de emprego, por esa razón volvemos solicitar a todos os Concellos da Mariña este novo plan integrado, e estamos agardando pola resolución. Este ano serían 100 os traballadores aos que se vai dar formación, dos cales temos que empregar a uns 24 ou 25 ao final para que teñan unha empregabilidade como mínimo de tres meses en diferentes empresas da Mariña. Estamos agardando e calculamos que antes de Nadal poidamos ter isto en marcha”.