Mondoñedo, 18 de abril de 2017.- A alcaldesa de Mondoñedo, a popular Elena Candia, anuncia que a vindeira semana darán comezo as obras de acondicionamento e urbanización da rúa Lence Santar e o seu contorno, tras a sinatura do correspondente convenio o venres día 21.
Trátase, segundo a rexedora, “dunha intervención moi necesaria e urxente” dada a situación que presenta esta rúa do casco histórico e que se desenvolve en virtude dun convenio asinado entre o Concello de Mondoñedo e o Ministerio de Fomento para levar a cabo actuacións de rehabilitación en zonas do conxunto histórico da localidade.
Candia informa de que a obra foi adxudicada pola Subdirección Xeral de Arquitectura e Edificación do Ministerio de Fomento a empresa Xestión Ambiental de Contratas S.L., por un importe de 155.800 euros (IVA incluído). Así, o contrato formalizarase este venres.
En concreto, a intervención na Rúa Lence Santar consistirá en dotala dunha pavimentación similar ao resto das que conforman o conxunto histórico da cidade. O proxecto inclúe a colocación de lousa de granito e cuarcita a modo de chapacuña.
Ademais, na Rúa Peña de Francia marcarase cun pavimento distinto a aliñación orixinal da rúa, colocando nesta zona unha serie de arborado. Así mesmo, executarase na zona unha nova rede de recollida de pluviais, abastecemento de auga e deixaranse previstas as canalizacións de telefonía, electricidade media e baixa tensión, ademais do alumeado público.