A Plataforma na Defensa da Sanidade Pública na Mariña pídelle a Balseiro que explique as modificacións da lei da saúde nunha asemblea con veciñas e veciños

A Mariña, 31 de agosto de 2017. A Plataforma en Defensa da Sanidade Pública na Mariña demándalle ao delegado da Xunta, José Manuel Balseiro, que se de verdade ten interese en que todo o mundo aporte e en que o proceso de modificación da lei da saúde sexa participativo, que convoque unha asemblea aberta a veciñas e veciños e persoal sanitario. “O resto que están facendo son meros paripés para tratar de adornar unha modificación que pretendían meter pola porta de atrás, en pleno mes de agosto; pero que recuaron vendo a resposta social”, afirman.
Desde a Plataforma insisten en que “é unha falta de respecto vir onte ao Hospital, cando estaba prevista unha concentración convocada pola xunta de persoal, e non dignarse a falar co persoal.”
“Vemos como o señor Balseiro toma boa nota do seu xefe e, calquera día, comparece nunha pantalla de plasma”, ironizan.
Pídenlle, ademais, que deixe de mentir e que se informe ou fale coas persoas usuarias ou co persoal da sanidade pública na Mariña para ver que todo o que di é rotundamente falso e que os datos avalan o fracaso do modelo iniciado polo Partido Popular coa creación da EOXI no ano 2010 e que pretenden consolidar con esta nova reforma.
As modificacións non son administrativas, consolidan a dependencia absoluta do HULA.
Este anteproxecto inclúe unha serie de modificacións sobre a citada lei de moito calado e con moita relevancia para o sistema sanitario galego: en termos de participación, de organización do mapa sanitario e os seus recursos, de formación, investigación e outras áreas.
“O novo modelo de xestión sanitaria promovido pola Xunta de Galicia responde ao esquema centralista e privatizador do Partido Popular. Así, segue reforzándose tamén por esta vía o papel das capitais de provincia en detrimento das comarcas, rompendo a lóxica de achegar os servizos ás persoas usuarias e apostando polo modelo centralizador que cada vez está máis cuestionado”
Pero ademais do despropósito da centralización existe unha mudanza da propia esencia da asistencia sanitaria: a lexislación vixente entende que a prestación sanitaria debe desenvolverse “tendo en conta as necesidades da cidadanía”. Pois ben, no novo texto a asistencia pasa a realizarse “en función dos recursos existentes”; polo tanto a partir de agora a calidade do servizo será en función dos orzamentos que decida o propio PP.
A experiencia EOXI: o fracaso anunciado da nova área HULA
En 2013, o SERGAS -“vía decreto e sen atender a razóns”- crea a EOXI de Cervo, Monforte e Lugo. “EOXI significa Estructura organizativa de Xestión integrada, mais de xestión nada e de organización menos aínda: 22 directivos para xestionar os recursos que se organizan desde Lugo.
Desde aquela, houbo 3 xerentes de EOXI. Un cuarto que tivo a dignidade de dimitir tras ter asegurado previamente que nunca se perdería a autonomía na xestión da Área e os outros seguen atornillados en distintos postos directivos do SERGAS. Esto amosa como, de feito, durante estes 3 anos, nin o propio SERGAS foi quen de atopar quen aturase o papelón de ser xerente dunha Área afogada e baleira de contido. Buscan agora a alguén que acepte a Xefatura de distrito (será así como lle chamen a nova dirección do centro), que terá que ser alguén que cale diante desta perda de autonomía.”
Igualmente, desde a Plataforma sosteñen que “este experimento da EOXI que agora dá un paso adiante vulnera outro aspecto dunha norma superior de Saúde Pública (Lei 33/2011, de 4 de outubro) que no seu artigo Artigo 3. Dos principios xerais de acción en saúde pública, e) establece un Principio de avaliación. As actuacións de saúde pública deben avaliarse no seu funcionamento e resultados, cunha periodicidade acorde ao carácter da acción.” Pois ben, explican, “o SERGAS non aporta memoria econónómica ou de xestión que xustifique as EOXI nin que explique o decreto de supresión das Áreas.”
O investido pola Estrutura de Xestión na Mariña e moi cativo”, aseguran, “e está agochado nas contas de toda a nova area HULA (EOXI até agora), xa que logo non existen dados por centro. Unha ferramenta contable que permite ao sistema EOXI-HULA distraer os cartos que tanta falla fan na Mariña”, conclúen.