O Goberno da Deputación mellora en Trabada con 200.000 euros a vía ao Hospital da Costa e o pavillón de Sante

Lugo, 25 de agosto 2017. O Presidente da Deputación de Lugo, Darío Campos Conde, e a Alcaldesa de Trabada, Mayra García supervisaron este venres pola tarde as obras da estrada de Fórnea, Vidal e Valboa, cun investimento de 150.000 euros; e as do polideportivo de Sante que contan cun investimento 42.000 euros.

“Dende a Deputación de Lugo favorecemos a igualdade de oportunidades nesta provincia envellecida. E sempre dixemos que queríamos unha Deputación coas persoas, social e co rural; por iso a nosa prioridade é atender ás demandas dos veciños e dos Concellos, con novas prestacións públicas, como hoxe en Trabada”, sinalou.

Novas actuacións dotadas de 55.000 euros de remanentes
O goberno da deputación financia con 55.000 euros máis melloras en viais municipais. Trátanse de fondos de remanentes de obras executadas no Concello, que tal e como acontece neste caso o organismo provincial permite reinvestir no propio Concello de Trabada. Estas obras son actuacións de rexeneración do riego asfáltico de máis de 1.500 metros, nas parroquias de Trabada, Sante e Valboa. Concretamente no núcleo de Sequeiro ata Lavandeira; dende Cabanas a Biduedo; así como os acceso de Casanova de Abaixo; Margaride; Barreiros e Xuga.

A rexedora agradeceu a implicación do Goberno da Deputación nestas novas dotacións. “Por un lado damos resposta á demanda veciñal, e ao mesmo solucionamos un problema que a propia Xunta non foi quen de dar resposta, xa que estas obras estaban contempladas no Plan de Melloras de Infraestruturas, pero foron rexeitadas. Dende o Concello de Trabada entendemos que son obras moi necesarias para todos os veciños que viven e traballan no rural, por iso priorizamos estes accesos”, explicou.

Mellora dunha estrada que conecta co Hospital da Costa
Campos Conde e García Bermúdez, acompañados de veciños supervisaron as obras de acondicionamento da vía de “Fórnea, Vidal e Valboa”. Esta estrada transcorre principalmente por Trabada, aínda que hai treitos que discorren por deslindes de Ribadeo e Barreiros. O Goberno da Deputación acordou financiar con 150.000 euros a mellora do firme con rego asfáltico de 7 quilómetros. Estas actuacións, para as que se coordinaron as 4 administracións locais mencionadas, benefician directamente aos 500 veciños que viven nunha vintena de núcleos rurais nas parroquias de Vidal, Fórnea e Valboa. Trátase dunha estrada moi empregada, pois conecta a zona co Hospital da Costa.

Melloras en dotacións deportivas públicas
Os mandatarios, tamén visitaron as obras de substitución da cuberta do pavillón deportivo municipal, que se sitúa no núcleo rural A Igrexa, da parroquia de Sante. O Executivo Provincial achega 40.000 euros e o Concello 2.000.