A Xunta presenta aos empresarios e comerciantes de Ribadeo as axudas e servizos que ofrece para apoiar o seu traballo

Ribadeo, 21 de marzo de 2018.- O delegado territorial da Xunta en Lugo, José Manuel Balseiro, presidirá esta tarde unha xornada informativa dirixida a empresarios e comerciantes de Ribadeo e da súa contorna, na que técnicos da Consellería de Economía, Emprego e Industria tasladarán as axudas e servizos cos que conta a Administración autonómica para apoiar o seu traballo.

O encontro, organizado en colaboración coa Asociación de Comerciantes, Industriais e Autónomos de Ribadeo (ACISA) e a Confederación de Empresarios de Lugo (CEL), tratará de sistematizar as distintas liñas existentes tanto no ámbito do asesoramento como do financiamento, así como as axudas específicas para emprender.

Así, para o sector do comercio, a Xunta vén de poñer en marcha este ano diferentes programas de axudas, que suman preto de 4,5 millóns de euros, entre os que destacan apoios por máis de 3,1 millóns para dixitalización e modernización das empresas comerciais e artesanais; unha liña dedicada á expansión comercial e novas fórmulas de comercialización, cun orzamento dun millón de euros; e unha iniciativa dotada con 255.000 euros para fomentar a comercialización da artesanía e o impulso da actividade do sector.

A xornada abordará igualmente as axudas dirixidas a autónomos e os apoios e incentivos para a contratación, ademais de explicar a liña de apoios dirixida ás empresas con interese en formar aos seus traballadores. O obxectivo de todos estes programas é estimular a creación de emprego, dinamizar a economía da comarca e fixar poboación.

A explicación inclúe tamén, a nova liña de Instrumentos Financeiros Innovadores (IFIs) para apoiar proxectos relacionados coa Industria 4.0. e as convocatorias de Galicia Emprende e Galicia Emprende no rural, ademais da liña de préstamos bonificados promovida polo Igape, para emprendedores.

Para rematar, Balseiro fará especial fincapé nas vantaxes que aporta a nova Lei de implantación empresarial para o desenvolvemento de iniciativas empresariais e industriais en Galicia. Así, as compañías interesadas en implantarse na Comunidade contarán cunha maior simplificación administrativa, máis facilidades no acceso ao solo industrial e máis incentivos fiscais, grazas á colaboración dos Concellos Emprendedores.