O Concello de Foz mellora o viario que comunica a estrada Ferreira-Cangas coa N-642. O investimento ascende a 90.000 euros

Foz, 4 de abril de 2018. O Concello de Foz está a realizar obras de mellora no viario da parroquia de Cangas que comunica a estrada LU-162, que é a que vai a Ferreira, coa N-642. O investimento ascende a 90.000 euros.
O concelleiro de Obras e Medio Rural, Pedro Fernández Manín, anuncia que “o Concello de Foz está a levar a cabo unha obra na parroquia de Cangas por un importe de 90.000 euros. Trátase do aglomerado en quente desde a LU-162, a estrada que vai de Ferreira a Cangas, ata Lamallada e o cruce coa Nacional, fronte á ITV”.
Pedro Fernández Manín explica que “estes cartos foran presupostados no ano pasado para construír unha senda peonil desde a estrada de Ferreira a Cangas ata Alemparte e quero agradecer os traballos que fixo a anterior directiva da antiga asociación de veciños de Cangas porque conseguiron a maior parte dos pasos, pero houbo tres señores cos que, nin eles nin por parte do Concello, non puidemos conseguir que nos deixaran pasar. Por conseguinte eses cartos, ao solicitalo agora a asociación de veciños nova, o que fixemos foi investilos na mesma parroquia pois xa estaban destinados para ela e necesitábase o reforzo dese asfalto nesta estrada”.
O edil de Obras e Medio Rural en Foz destaca que “a isto unimos outra obra que hai pouco tempo acabamos de rematar, que é o acceso a Ribela desde a estrada nacional, que tamén se fixo con aglomerado, na mesma parroquia. Ademais cambiouse a traída de augas, que foi un esforzo por parte deste Concello e sabemos que toda a zona quedou moi agradecida do traballo que se fixo”.
Fernández Manín engadiu: “quero pedirlles desculpas aos veciños de Cangas que circulan por esta estrada que estamos a mellorar agora, na que xa iniciamos a limpeza de cunetas e logo se vai facer o aglomerado, porque vai haber algún corte de tráfico posiblemente. Que saiban que non podemos levar todo seguido porque temos que facelo en partes para que poida permitirse a circulación. Pídolles desculpas se obstruímos algo o tráfico, que sexan comprensivos porque entendemos que é unha obra moi necesaria pois vértebra de Cangas a Nois xa que é unha das principais unións das dúas parroquias”.