Foz 30-8-18. Desde hai xa seis anos, a arte converteuse nun evento sen o que non se entende o mes de decembro no Córgomo, un pobo de Vilamartín de Valdeorras. Córgomo Arte é o proxecto persoal de Manolo Conde e Victorino Núñez, un exemplo de proxecto de comunidade que integra a arte contemporánea nos ritmos vitais e culturais do rural. Porque aínda que ignorado polas políticas culturais, o rural tamén existe e gusta da arte. Córgomo Arte constitúe un acto de rebeldía contra o establecido, desborda ilusión e por vez primeira vai deixar a comarca de Valdeorras para tratar de tender pontes e estender o efecto contaxio á comarca da Mariña de Lugo. De feito o certame contou nesta última edición coa participación de artistas mariñanos coma Lu Vila, Cris Basanta, Martín Lestao ou Patricia Arellano.
Córgomo Arte é un proxecto que nace dunha necesidade, da de atopar un espazo de expresión para a arte, un lugar onde a liberdade creadora se atopase libre de ataduras, onde fose xenuina. O tema escollido para esta nova edición discorre nesta mesma liña de pensamento. “ABISMOS, ENTRE A SOMBRA E A ALMA” xurde dun verso dun poema de Pablo Neruda e dalgunha maneira expresa esa paixón irracional necesaria para a creación artística. Queremos avanzar na proposta presentada o ano pasado e continuar espindo a arte de artificios. Nesta convocatoria queremos convidarvos a reflexionar sobre o que somos como individuos, buscar esa verdade que reside no noso eu máis fondo, entre a sombra e a alma, oculta entre as moitas capas de apariencia coas que nos cubrimos ante a imposición do “que deberíamos ser”. A arte non é máis ca un producto desa diverxencia interna e queremos que neste certame a arte se presente como unha manifestación dese eu verdadeiro, unha revelación apaixoada do ser, a arte como verdade, como unha liberación irracional dos instintos.
Na mostra poderemos disfrutar das obras de:
Manuel Conde (Córgomo)
Victorino Núñez, “Torino” (Carballal de Petín)
Patricia Arellano (Burela)
Cristina Basanta (Viveiro) e Lu Vila (Barreiros)
Martín Lestao (Burela)
Patricia Fernández Paz (Chantada)