O PP de Ribadeo culpa ao Alcalde das consecuencias da revisión catastral porque foi el quen a solicitou

Ribadeo, 24 de outubro de 2017. O Partido Popular de Ribadeo culpa ao alcalde das consecuencias da revisión catastral porque foi el quen a solicitou.
O voceiro do PP no Concello ribadense, Jesús López Penabad, manifestou que “o alcalde solicitou no seu momento a renovación do Catastro e consecuencia disto aparecen agora no Boletín Oficial do Estado (BOE) aproximadamente 1.000 persoas de Ribadeo, con nome, apelidos e DNI, como presuntos debedores coa contías que teñen que abonar. O prazo de pago é ata o 15 de novembro. Son os atrasos desde o ano 2012 ao 2015 como consecuencia desa renovación catastral, por ese cambio de valor que se incrementou, e pásano agora todo xunto, nunha soa contía, que nalgúns casos son moi elevadas. Antes de aparecer publicado no BOE tivo que haber previamente dúas notificacións que esas persoas non recibiron”.
Jesús López Penabad pregúntalle ao alcalde, “que é tan afeccionado a publicar bandos ultimamente, por que non anuncia isto, porque as persoas que non o paguen no prazo establecido terán un recargo do 20 por cento, co cal as contías, que as hai de todos os tamaños, veríanse bastante incrementadas”.
O portavoz do PP en Ribadeo engadiu que “son os coletazos dese catastrazo do que alcalde é responsable desde o momento que solicita esa actualización do Catastro. E agora veñen as cantidades correspondentes a catro anos xuntos e faise algo grande para moitos dos afectados. Son as consecuencias dese catastrazo, polo que hai unha tempada moitos veciños de Ribadeo tiveron que pagar 60 euros e despois a suba e os atrasos que lles supuxo ese catastrazo. Os que non o fixeron naquel momento téñeno que pagar agora, porque aquí non se libra ninguén. Pola parte dos que gobernan no Concello tivérono moi calado porque lles interesa, xa que serve para engrosar as arcas municipais”.
Por outra parte, López Penabad tamén critica que o Imposto de Bens Inmobles “puido pagarse o ano pasado ata o 14 de decembro e este ano o prazo remata o 15 de novembro. E as economías están como están, polo que sería mellor para as familias poder pagalo en decembro, porque nese mes adoita haber unha paga extraordinaria, coa que sería máis fácil poder facerse cargo do pago deste imposto”.
Os responsables do PP en Ribadeo póñense a disposición dos afectados polas consecuencias da revisión catastral e atenderanos na súa sede os xoves de 19 a 21 horas.