O PP de Ribadeo critica ao equipo de goberno municipal por non invitar nin siquera informar aos concelleiros da oposición de actos que organiza o Concello, como a pasada Gala do Deporte

Ribadeo, 4 de abril de 2018. O Partido Popular de Ribadeo critica ao goberno municipal por non invitar e nin sequera informar aos concelleiros da oposición de eventos que organiza o Concello como a Gala do Deporte celebrada o pasado luns.
O portavoz do PP, Jesús López Penabad, manifesta: “outra vez, e non nos cansaremos de repetilo porque nos parece lamentable, falta protocolo e falta educación sobre todo. Este luns houbo a Gala do Deporte e o portavoz do PP, creo que como o resto da oposición porque non estaban presentes, enterámonos polos medios de comunicación de que había esa gala. Eu achegueime ata alí e estiven no público. Resulta curioso que como membros que somos da corporación municipal, como representantes dos ribadenses pois entre PP, PSOE e Ciudadanos ao mellor temos tantos votos como teñen eles ou preto e non había ninguén dos grupos da oposición participando no acto”.
Jesús López declarou tamén: “quero felicitar a todos os deportistas ribadenses, aos que foron galardoados e aos demais que practican e loitan día a día por conseguir novas metas e novos logros. Desde o Partido Popular quero darlles a máis sincera noraboa, a alegría e o pracer de ter en tantos deportes representantes moi destacados”.
O voceiro do PP salienta que “Ribadeo tivo a cuarta Gala do Deporte, que eu definiría como a cuarta gala do BNG no deporte de Ribadeo porque os únicos representantes que houbo son os do goberno. Xa sabemos que teñen a maioría absoluta e que gobernan con rodillo, pero creo que deberíamos ser invitados todos dos concelleiros, e ademais nós estaríamos encantados de poder participar e de representar aos ribadenses. Levamos catro edicións deste evento e nunca nos invitaron á Gala do Deporte. Paréceme lamentable. Onde está o protocolo e a educación? Onde están os representantes resto dos ribadenses? Aos deportistas estrañaralles que non esteamos os concelleiros dos partidos políticos da oposición, pero simplemente é porque desde o grupo de goberno non recibimos invitación. Non nos invitan nin a isto nin a outros actos que organiza o propio Concello”.
López Penabad rematou comentando: “preguntámonos por que? Estorbamos? Só vostedes (os concelleiros do goberno municipal) teñen capacidade para poñer as medallas e despois queixarse? Non o entendemos, desde logo parécenos lamentable e seguimos denunciándoo porque segue ocorrendo día a día”.