A nova Edar podería ser licitada no 2018 e as obras prolongaranse como mínimo durante dous anos. así o comentou o Alcalde, Alfredo Llano, tras a reunión mantida esta mañá con responsables de Augas de Galicia

Burela, 30 de agosto de 2017. O Concello iniciará os traballos de limpeza na zona portuaria onde se vai construír a nova EDAR para realizar o primeiro estudo topográfico. O alcalde, Alfredo Llano, reuniuse hoxe con responsables técnicos de Augas de Galicia que visitaron os terreos. Actualmente o proxecto está en fase de redacción e no 2018 podería ser licitada a obra, que se prolongará por un tempo mínimo duns dous anos. Mentres a nova EDAR non entra en funcionamento realizaranse obras de mellora na depuradora actual.
O rexedor burelés declarou que “hoxe tivemos a visita esperada dos responsables técnicos de Augas de Galicia e estivemos vendo todo o relativo á nova EDAR de Burela. Estivéronos contando cómo ía de avanzado o proxecto, cómo hai que ubicar as diferentes seccións na localización que temos preparada no porto, que son pouco máis de 3.000 metros cadrados. É unha obra moi esixente porque ten que coller nese espazo e están tratando de mirar a mellor tecnoloxía a aplicar, e un sistema de mantemento suficiente para Burela. Hai que ter en conta que se está proxectando unha EDAR que vai dar cobertura aproximadamente a 15.000 habitantes”. Alfredo Llano dixo “que no encontro que mantivemos esta mañá aportamos os datos que solicitaron sobre consumo de auga en lugares singulares como o hospital, o porto ou o polígono industrial”. Na xuntanza estiveron Juan Álvarez De Gabriel, xefe de sección do departamento de obras de Augas de Galicia, acompañado doutro técnico dese ente, a arquitecta do Concello burelés, o concelleiro de Obras, Ramiro Fernández Rey, e o rexedor.
O alcalde subliñou que “hai moita obra que facer, hai que meter os separativos de pluviais e residuais, hai que facer obra para minimizar ao máximo as crecidas de auga que van parar ao porto, e un sistema de trituración e outras ferramentas que fan falla. É unha obra que agora mesmo están a proxectar, supoñen que van rematar este ano, e durante o ano que ven pasaría a ser licitada, se é posible”.
Alfredo Llano engadiu que “unha vez que se poñan á obra vai levar o seu tempo porque ten unha complexidade extraordinaria e hai que facer traballos no porto, para o que temos que buscar a mellor fórmula. É unha obra moi necesaria e polo tanto mentres non se dea construído imos tratar de mellorar a depuradora que hai agora. Imos colocar unha nova trituradora e buscar un sistema para que unha vez que entre en carga se minimicen os efectos, e imos procurar durante este tempo de obra da nova EDAR ter a antiga ben preparada. Imos facer unha serie de obras complementarias, por un lado as separativas de pluviais e residuais, e o emisario posiblemente haberá que movelo pola nova ubicación”.
O rexedor comentou que “todo no seu conxunto vai requirir un traballo extraordinario e a obra efectiva tamén vai levar o seu tempo porque non é nada fácil traballar na zona portuaria. Hoxe foi a primeira visita e quedamos en que o Concello fará unha limpeza da zona para facilitar o primeiro estudo topográfico, e despois mirar tamén o estudo xeotécnico. Hai que ir pouco a pouco con esta obra que é tan necesaria para Burela”.