Basanta considera que estamos ás portas do peche da delegación.
Os nacionalistas demandan o apoio social e institucional para manter o servizo.
Foz, 15 de abril de 2013.- O Bloque Nacionalista Galego de Foz observa con particular preocupación a resolución do Ministerio de Facenda e Administracións Públicas publicado no BOE do 16 de febreiro de 2013 pola que se modifica a estrutura e organización territorial do citado organismo tributario e que vai significar unha perda de servizos da Delegación da Axencia Tributaria de Foz.
O Portavoz Municipal do BNG, Xoán Carlos G. Basanta, denunciou “ a operación do Partido Popular para desmantelar a oficina da Axencia Tributaria en Foz, operación que se executa co silencio e a complicidade do goberno local, que unha vez máis ponse en contra dos intereses dos seus veciños e do seu pobo actuando como fiel vasalo dos intereses do partido. Despois de 28 anos prestando servizos na nosa localidade que evitaba que a veciñanza tivese que desprazarse ata a capital da provincia para resolver calquera trámite coa Axencia Tributaria, agora as declaracións de IRPF ou IVE, xunto coas tramitacións de aprazamentos de pago ou presentación de recursos, é dicir, a tramitación de expedientes de principio a fin, non poderán realizarse en Foz. De agora en diante estas xestións poderanse iniciar na Administración de Foz pero, en moitos casos, a revisión ou tramitación final do expediente non poderá facerse nestas localidades, coa conseguinte necesidade de desprazarse”.
“Temos o firme convencemento de que estamos na antesala do peche deste servizo”, afirmou Basanta quen indicou “que a resolución que entrou xa en vigor o 25 de febreiro responde ao afán centralizador do Partido Popular, diante das ansias de afastar os servizos públicos da cidadanía coa escusa da austeridade. É máis, non existen razóns técnicas nin obxectivas para que unha Administración coa carga de traballo que teñen nas oficinas de Foz pasen a ser unhas meras oficinas de información e asistencia, vulnerando así o dereito dos contribuíntes a ter acceso aos seus expedientes e a realizar as tramitacións sen ter que desprazarse a Lugo. Unha vez máis, o goberno do PP actúa con nocturnidade e alevosía, mediante a política de feitos consumados e sen consultar cos traballadores nin os seus representantes, nin cos gobernos dos concellos afectados polos seus recortes tan fundamentais nos servizos públicos”.
O BNG levará unha iniciativa parlamentar ao Congreso dos Deputados demandando a marcha atrás na decisión do Estado e que se manteñan os mesmos servizos que até o de agora se viñan prestando á cidadanía nas Administracións da Axencia Tributaria en Foz, evitándolle á veciñanza da Mariña ter que desprazarse para realizar todo tipo de trámites, e impedindo que un servizo público se afaste dos cidadáns que atende así como que se garanta os postos de traballo que actualmente existen na Administración da Axencia Tributaria en Foz.