Alfredo Llano asistirá este mércores en Moeche a unha xuntanza sobre o tren que vai manter a comisión técnica de traballo da que forman parte os concellos de Ortegal, Ferrolterra e A Mariña luguesa

Burela, 3 de abril de 2018. O alcalde, Alfredo Llano, asistirá este mércores en Moeche ás 10 da mañá á xuntanza sobre o tren que manterá a comisión técnica de traballo da que forman parte os Concellos de Ortegal, Ferrolterra e A Mariña luguesa. O rexedor seguirá a defender un tren que sexa útil para os traballadores, para os estudantes e para os usuarios do Hospital da Costa.
Llano contou que “no concello de Moeche manteremos mañá unha reunión da comisión da que formamos parte para estudar a problemática derivada do tren que pasa pola Mariña. Xa tivéramos outras reunións desta comisión que está constituída por representantes dos concellos da Mariña e do Ortegal e tamén de Adif, de Renfe e da Xunta de Galicia. Entre todos estudamos a problemática e tratamos de aportar dalgún xeito, dentro das nosas posibilidades, as nosas peticións, as nosas reclamacións e a esixencia constante de que queremos un tren de calidade que pase pola nosa comarca e que sirva para o seu desenvolvemento turístico, económico e social”.
O rexedor burelés dixo: “cremos que é fundamental que siga pasando este tren pola Mariña nas mellores condicións de uso, tanto para transporte como para viaxeiros, que teña calidade e desde logo que cumpra os requisitos de funcionalidade que xa temos dito con respecto aos horarios. Aquí defendemos todos un tren de cercanías que se achegue desde O Vicedo ata a Ribadeo e que sexa útil para levar pasaxeiros ao seu traballo, pero tamén para ser atendidos no Hospital da Costa, facer trámites ou incluso para os propios estudantes que se desprazan a diversos institutos en diferentes localidades da Mariña”.
O alcalde de Burela subliñou que “por tanto nosoutros vamos seguir insistindo en que isto é unha necesidade: ter un tren con boas condicións e que se incrementen e melloren os seus servizos. Antes eran en Ferrol as reunións e esta vez será en Moeche, un concello que tamén está implicado e que forma parte da comisión como Burela e outros. Veremos como se desenvolve todo e seguiremos firmes nas nosas reclamacións para facer o máximo e o mellor posible polo noso tren”.